冷風咧吹，雨嘛咧落 布篷予風吹甲噗噗叫 敢若鳥隻拍翼的聲音 鳥隻活佇籠仔內，想欲飛離開 可惜啊，鳥籠仔的鐵枝粗閣勇　　　　　　　　　　　　　 布篷予風吹欲倒 親像鳥隻飛起，隨來硞著頭 可憐啊，鳥籠仔做甲低閣狹 主人講：戇鳥仔，戇鳥仔，你免想欲飛 有飼料予你食，袂得嫌矣 　　　　　　　　　　　 毋過鳥仔內心有向望 飼料的芳，毋值著軟軟的菜蟲 我欲飛，自由的飛 飛去白蔥蔥的雲內 飛過青ling-ling的山嶺，佮開闊的大海　　　　　　　　　　　　 我欲做岫佇大樹頂 我欲徛佇懸懸的山崖頂 大聲叫出：我才是主人